Մեկնարկեց «Իրազեկ
առողջապահություն» ենթադրամաշնորհային ծրագրի շրջանակներում իրականացվող իրազեկման
սեմինարների շարքը, որոնցից առաջինը անցկացվեց Գյումրիում։
Ծրագիրն իրականացվում է Եվրոպական միության ֆինանսական
աջակցությամբ, «Ինֆորմացիայի ազատության կենտրոն» ՀԿ-ի կողմից իրականացվող ծրագրով
տրամադրված ենթադրամաշնորհի շրջանակում։
Բացման խոսքով հանդես եկավ «ՀՕՖ բժշկական շրջանավարտների
ասոցիացիա» հասարակական կազմակերպության նախագահ բժիշկ-ալերգոլոգ Արմինե Հակոբյանը, ով ներկայացրեց ՀՕՖ բժշկական
շրջանավարտների ասոցիացիա»-ի գործառույթները և այն հնարավորությունները, որոնք ասոցիացիան
ընձեռում է բժիշկներին։
Այնուհետև ներկայացվեց «Իրազեկ առողջապահություն» ծրագիրն
ու վերջինիս նպատարկները ու հետագա քայլերը: <<Մենք նպատակ ունենք բարձրացնել
հազվադեպ հանդիպող ժառանգական անգիոայտուց հիվանդության վերաբերյալ բժիշկների տեղեկացվածությունը,
դրանով իսկ մեծացնելով հիվանդների ճիշտ և ժամանակին ախտորոշումը, հետագա վարումը, ինչպես
նաև բարձրաձայնել հիվանդների խնդիրները>>, նշեց ՀՕՖ ԲՇԱ նախագահը:
Միջոցառման մասնակից բժիշկներ Մարիամ Մովսիսյանը և Սևան
Իրիցյանը ներկայացրեցին ժառանգական անգիոայտուց հիվանդության ընթացքի, ախտորոշման և
բուժման հետ կապված, ինչպես նաև հիվանդության հազվադեպ լինելու հետ կապված խնդիրները
և դրանց լուծման հնարավոր տարբերակները: Բարձրացնելով բժիշկների տեղեկացվածությունը՝
նման հիվանդների հայտնաբերման հավանականությունը կարող է մեծանալ, ինչը թույլ կտա ստեղծել
հիվանդների բազա և միջազգային կազմակերպությունների օգնությամբ գտնել լուծումներ հիվանդների
կյանքի որակը բարելավելու ուղղությամբ: Արարողությանը ներկա էին ներկայացուցիչներ Շիրակի
մարզի մարզպետարանի առողջապահության վարչությունից, բժիշկներ Շիրակի մարզի տարբեր բժշկական
կենտրոններից և պոլիկլինիկաներից։ Սեմինարից հետո մասնագետները իրակացրեցին նախապես
գրանցված հիվանդների անվճար զննում: